नेपाली हास्यव्यङ्ग्य अनलाइन पत्रिका

डिल्लीप्रसाद मूलतिहुन :

सुन्नेले थपडी ठोके हौसिँदै बोल्न थाल्छु म
जोरीखोज्छ भनेकोही एक्लैदेश उचाल्छु म (१११)

शान्ति स्वतन्त्रता ,क्रान्ति भन्दै मै हुँ निमोठिने
बाटोमा प्रहरीलाई ढुङ्गा ताकेर उफ्रिने (११२)

जिन्दा मुर्दा दुवैवाद फलाक्ने अनि गर्जिने
हान ठोक भनी सोझा उकासेर म नै हिडेँ (११३)

भालासाला सबै बोक्ने मेरो सिद्धान्त हो सुन
यो हाम्रो दलको नीति सिघ्र लागू गराउन (११४)

यस्ता मान्छे सधैं मैले दायाँबायाँ लगाउँदै
चुनावमा म जित्नेछु भूतप्रेत जगाउँदै (११५)

कुर्सी भेट्न सधैं यस्तै छुद्र हर्कत गर्छु म
इच्छा पूरा भए भोलि देशै बिर्सेर चर्छु म (११६)

बेग्लै ढाँचा निकालेर म ब्यवस्था चलाउँछु
म आफ्नो स्वार्थ हेरेर गाउँ बस्ती जलाउँछु (११७)

द्रव्य फल्ने कुरा पाए थुप्रै नाटक गर्छु म
यस्तै द्रव्य जुटाएर निजी भण्डार भर्छु म (११८)

सोझासिधाहरूलाई झुक्याएर यसैगरी
तानाबाना मिलाएर मज्जा लिन्छु सधैँभरी (११९)

उम्लिँदै पोखिँदै गर्छु डिकले बस्न जान्दिनँ
यस्तो टासिन्छु कुर्सीमा खसाल्छन् खस्न जान्दिनँ (१२०)

क्रमशः

०००
चाँगुनारायण, भक्तपुर