नेपाली हास्यव्यङ्ग्य अनलाइन पत्रिका

केशवराज आमोदी :

नेपाल बन्छ कसरी जनता निचोरी
उद्योगका जगहरू सब ध्वस्त पारी,
देखिन्छ भाषण-छुरा अति बिघ्न लाग्ने
खै योजना गरिबका सपना सिंगार्ने ?१

सत्सङ्ग धूर्तहरुकै अति गर्नु पर्ने
कर्तव्यशून्य , धन-चिन्तन गर्नुपर्ने,
बेचेर देश अनि पेट छ भर्नुपर्ने-
खै राजनीति श्रम-जीवन स्वच्छ पार्ने ?२

छुट्छन् अजस्र अझ बन्दुकयुक्त गोली
भर्दो छ नित्य धनको बटुलेर झोली
झुक्दो छ दक्षिणतिरै मन देख्छु चर्ने
खै योजना सहिदका सपना सिंगार्ने ?३

घोकेर दर्शन कुनै मति सुध्रिदैन
माओ र लेनिन पढी मन उघ्रिदैन
हुन् दास केवल यिनै स्थिति नै बिगार्ने
खै राष्ट्र-चिन्तन नयाँ सपना सिंगार्ने ?४

नारी बलात्कृत हुँदै कति रोइरे’छन्
खोजेर न्याय दरिलो दगुरी रहेछन्
छन् भ्रष्ट मात्र तर देख्दिन क्वै हकार्ने
खै राजनीति जन-जीवन रम्य पार्ने ?५

खै राजनीति युगको, नव चेतनाको !
खै शुद्ध चिन्तन यहाँ मृदु प्रेरणाको !
उल्टो छ राष्ट्र ढुकुटी घरमा थुपार्ने
खै योजना मुलुकको सपना सिंगार्ने ?६

०००
चितवन