होम सुवेदीउकु चाहिएको छ
मौका चानस नगुमाऊँ पाकेको फल खाऊँ मुख बाऊँ दर्खास्त दिन ढिलो होला जागिर अमिलो होला यसैले म्याद बढाइएको छ उकु चाहिएको छ ।
हाेम सुवेदी :
जता फर्कायो उतै फर्कने
जहाँ बाँध्यो उहीँ खर्कने
मौकामा घोक्रो फुट्ने गरी चर्कने
ए कोही छ कि
यो न्यूनतम योग्यता भएको
त्यस्तो घागडान
त्यता कोही पाइएको छ ?
हामीलाई उकु चाहिएको छ ।
एक वर्षको काम
पाँच वर्षमा पनि नसक्ने
दबाब दिएमा नडग्ने
सकेसम्म देश र जनतालाई ठग्ने
जहाँ बसायो त्यहीँ हग्ने
जता भन्यो उतै बग्ने
ए कोही छ कि
यो न्यूनतम योग्यता भएको घागडान
त्यता कोही पाइएको छ ?
हामीलाई उकु चाहिएको छ ।
परिआउँदा जुध्न सक्ने
जता जता पनि कुद्न सक्ने
समस्या पर्दा पछाडिबाट भाग्ने
परिआउँदा बन्दुक दाग्ने
अग्लो बार फुत्त नाग्ने
मौकामा बाँच्न भिक माग्ने
ए कोही छ कि
यो न्यूनतम योग्यता भएको घागडान
त्यता कोही पाइएको छ ?
हामीलाई उकु चाहिएको छ ।
बजेट खान सक्ने
छोरी चेली लान सक्ने
जुन ओछिनमा पनि जान सक्ने
झोला भिर्ने
छात्रलाई पिर्ने
दुलाबाट छिर्ने
जता पनि फिर्ने
असपतालमा गिर्ने
ए कोही छ कि
यो न्यूनतम योग्यता भएको घागडान
त्यता कोही पाइएको छ ?
हामीलाई उकु चाहिएको छ ।
मौका चानस नगुमाऊँ
पाकेको फल खाऊँ
मुख बाऊँ
दर्खास्त दिन ढिलो होला
जागिर अमिलो होला
यसैले म्याद बढाइएको छ
उकु चाहिएको छ ।
००
उकु भनेको उपकुलपति ।
०००
भद्रपुर, झापा
Subscribe
Login
0 Comments
Oldest
