काशीनाथ मिश्रितफेरौँ न मन्त्री अब !
त्यो पार्टी बदली यतातिर सरौँ मन्त्री बनौँला भनी उम्मेद्वार हुँदा प्रशस्त रुपियाँ खर्च्यौँ गनी छन्छनी ! लाखौँ खर्च भयो चुनाव लडदा बेजो उठाऔँ सब !! हामी सांसद मात्र भै कति बसौँ ? फेरौँ न मन्त्री अब !!
काशीनाथ मिश्रित :
ओहो ! वर्ष पुगेछ क्या हजुरले मन्त्री बनेको पनि !
पालो गर्नु पर्यो, पुग्यो हजुरको, इच्छा सबैको छ नि ।
अर्को पल्ट चुनाव जित्न सकिने हो हैन ठेगान के ?
जम्मा गर्नुहवस् प्रभो हजुरका चम्चे हुँके बैठके !!
खाडीमा करिया बनेर ढुकुटी रैतीहरू भर्दछन्
हेर्ने फुर्सदसम्म छैन प्रभुको को को कहाँ मर्दछन् ?
गोष्ठीमा सहभागिता हुन सके पो देश यो बन्दछ !
के ठेगान नपाउँदै भ्रमणको मौका गएमा पद ?
मन्त्री भैकन राज्यकोष नलुटे बैमान के मान के ?
पौँची जेल पुनः तुरुन्त नछुटे सम्मान के सान के ??
टुक्र्याईकन भाग पुग्दछ भने सम्पूर्ण मन्त्रालय
टुक्र्याऔँ न खसी समान, सबले बन्नै छ मन्त्री अब !
यौटाले कति खानु हो ! सब मिली बाँडेर खाने गरौँ
बाधा गर्छ विधानले यदि भने भाँडेर खाने गरौँ !
सत्तामा रहँदासमेत यसरी दुब्लो भई के मरौँ ?
ती पाजी जनता परून् न सुकुटी, हाम्रो भकारी भरौँ !
त्यो पार्टी बदली यतातिर सरौँ मन्त्री बनौँला भनी
उम्मेद्वार हुँदा प्रशस्त रुपियाँ खर्च्यौँ गनी छन्छनी !
लाखौँ खर्च भयो चुनाव लडदा बेजो उठाऔँ सब !!
हामी सांसद मात्र भै कति बसौँ ? फेरौँ न मन्त्री अब !!
सत्ता हो गुलियो, विपक्ष अमिलो ! चाटौँ चुसौँ तन्तनी
भत्तामा झुलियो, कबोल भुलियो ! लाग्यो नशा फन्फनी
भड्खालातिर जाकियोस् मुलुक यो कल्ले गरोस् मत्लब !
फेर्ने हो र मुहार यो मुलुकको ? फेरौँ न मन्त्री अब !!
०००
फोक्सिङ, गुल्मी
Subscribe
Login
0 Comments
Oldest
