नेपाली हास्यव्यङ्ग्य अनलाइन पत्रिका

लक्ष्मण नेवटिया :

सबैलागेका छन् म नदीको किनार काटेर
घर-घडेरी बसाउन कित्ता मिलाउन
यही दशा रहेमा बेर लाग्नेछैन
मेरो अस्तित्व नै
नदीको सट्टा -नाला भै विलाउन ।

त्यसमा पनि झन्-
किन मलाई झुठो आरोप लगाइन्छ
बस्तीमा पसेको छ नदी ।
जबकी झन् नदीमा पसेको छ बस्ती ।

कहिले आँखा चुहाउँछु
कहिले मनैमन भुनभुनाउँछु।
जो छ नैतिकताविहीन निर्लज्ज,
लाज मेरो खुलेआम लिन तम्सिन्छ।
न्याय कहाँ पाउनु दिने नै पन्छिन्छ ।

मिथ्या चाप सहँदा सहँदै
निराधार कुरा सुन्दा सुन्दै,
एक्कासि रक्तचाप बढेको छ मेरो
अत्तालिएर जति गर्दा पनि रोइलो
कतै भएको छैन सुनुवाई
अखबारभरि झुठो खबरको छपाई
गरिँदैछ जानाजान गल्ती
कहिल्यै हुने छैन जुन क्षतिको भर्पाई ।

दोष पनि त मेरै हो
मेरै आशीर्वादले बस्तीले त गर्‍यो प्रगति
तर झन् मेरै भएको छ दुर्गति ।

अचम्भको छ यो प्रीतिमा चोबलिएको
बस्ती र नदी बीचको झगडा ।
एकलाई अर्को नभई नहुने
न कहिले रोकिने- न कहिल्यै सिद्धिने !!!

०००
विराटनगर