नेपाली हास्यव्यङ्ग्य अनलाइन पत्रिका

भोजराज रेग्मी ‘मुखाले’ :

शिशीर नजानू, वसन्त न आउनू
भाले नबास्नू, कोइली न गाउनू
बोका छँदैछन्, हलगोरु न दाउनू
हे गर्भवतीहो ! नानी न पाउनू !

साँझ बिहान अघाई न चुठ्नू
सुतिरहनू, सखारै न उठ्नू !
हे लम्फुदास ! प्यारा प्रजा हो !
फुटिरहनू, कहिलै न जुट्नू !

चुनाव न आउन्जेल उपवास बस्नू
भोकतीर्खा लागे पटुकीले कस्नू
चुनावभरी मनमौजी भतेर खानू
उप्रान्त चुपचाप नर्कवास जानू ।

दाह्रा न किट्नू, पाखुरा सुर्की नहाल्नू
आशा आकाङ्क्षा सप्पै खुर्की फाल्नू
हे भुक्तमान जनताजनार्दन !
मेरो भजन गाउँदै लाखबत्ती बाल्नू !

०००
पेप्सीकोला