नेपाली हास्यव्यङ्ग्य अनलाइन पत्रिका

घनश्याम रेग्मी :

कालो र सेतो रङ छापिएको
बोको थियो त्यो अलि मात्तिएको
भन्दा र सुन्दा पनि लाग्छ लाज
बोको हरायो घरबाट आज ।१

देखेर अर्को कि बगाल बाख्रा
ठानेर भाग्यो कि घरान आफ्ना
कता गयो खोज्न समेत लाज
बोको हरायो घरबाट आज ।२

उत्ताउलो त्यो जखरे हुनाले
कामेच्छ भारी तनमा हुनाले
भागेर वा दूर कतै छ काज
बोको हरायो घरबाट आज ।३

लामा तिखा ती सिङ बाङ्गिएका
दाह्री बढी झ्याप्प छ झ्याम्मिएका
नेता हुँ भन्थ्यो सहरै पस्यो कि
कुर्सी चुनी बैठकमै बस्यो कि ।४

आवाज नौला उसले निकाली
बड्केउला बर्बर बर्र पारी
फोहोर गर्दै सब यो समाज
बोको हरायो घरबाट आज ।५

बाँधेर राखे पनि हल्लिखल्ली
खोले फुकाए पनि यो बिचल्ली
ऐना छ जस्तो छ उसै समाज
बोको हरायो घरबाट आज ।६

चन्दा र हप्तातिर पल्कियो कि
छोडेर पाटी गुटमा फस्यो कि
काटिन्छ वा झर्दछ झोल साँझ
बोको हरायो घरबाट आज ।७

०००
बैजनाथ -१, चिसापानी, बाँके