नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

हिजो अस्तिसम्म
टोले गुन्डाहरुसँग मिलेर
हप्ता उठाउने रामे
सासुको आशिर्वादले
राजदूतमा नियुक्त भएछ !

हिजोसम्म
एरपोर्टबाट सुन ओसार पसार गर्ने भरिया श्यामे
पुलिससँग लुकामारी गर्दै हिँड्थ्यो
जेठानको कृपाले
एरपोर्टको हाकिममा नियुक्ति पाएछ

हिजोसम्म्म
नक्कली शैक्षिक प्रमाण पत्रको धन्दा चलाउने कृष्ण प्रसादले
दाज्यू नेताको कृपाले
सेटिंगबाट सर्बसम्मत
विश्व विद्यालयको भिसीको पद पड्काएछ

हिजोसम्म
बडा नेताको घरमा भात पकाउने डल्ली
नेताज्यूको कोटामा
समानुपातिक सांसद भइछ !

हिजोसम्म
नेताको अगाडि पछाडि कुम हल्लाउने श्यामे
मालिक्नीको बक्सिस पाएर
ठूलै कम्पनीको हाकिम भएछ !

हाम्रो नेतातन्त्र
नेताको भाग्य
फुलोस् फलोस् !

०००
गाेरखा, हाल काठमाडाैं