धमिरो
फैलाई दासता भुत्ते पार्दै राष्ट्रिय चेतना खुट्टाको बदला दिन्छ बैसाखी उपहारमा लिलामी भाट भाडाका नचाई खुब फन्फनी सत्ताको स्विच चोर्दै छ बहुराष्ट्रिय कम्पनी ।
रुद्र ज्ञवाली :
ठेक्कामा देश माग्दै छन् विदेशी बनियाँहरू
बिक्दै छ देश बेच्दै छन् बिकाउ करियाहरू
हस्तक्षेप छ अर्कैको फुस्क्यो धोती र कन्दनी
सर्वेसर्वा भए छट्टु बहुराष्ट्रिय कम्पनी ।
सियोभै छिर्छ हात्तीझैँ ठाउँ आफ्नो बनाउँछ
पासो थापेर गौडामा मर्म मर्म समाउँछ
छोए ऐंजेरुले जस्तै ध्वस्त पार्दछ जिन्दगी
विषको मन्द मात्रा हो बहुराष्ट्रिय कम्पनी ।
च्याँखे विकासका थापी निर्धा निर्धन देशमा
पस्दै लुसुक्क दाताको कुटिल छद्मभेषमा
गुनको बदला माग्ने गर्छ अस्तित्व बन्धकी
मृगको खालमा स्याल बहुराष्ट्रिय कम्पनी ।
फैलाई रोग रोगीको खोज कस्तो निदान हो
नव विस्तारवादीको यै सिद्धान्त विधान हो
लुटी अपार यी स्रोत सित्तै लैजान्छ जो मणी
खतरा धमिरो जस्तै बहुराष्ट्रिय कम्पनी ।
कैले ताक्छ नदीनाला कैले हिमाल ताक्दछ
दिन्छ हजारमा लाख लैजाने सर्त राख्दछ
हाम्रा दुर्बलतामाथि गर्दै बर्बर ज्यादती
छाडा साँढे बनेको छ बहुराष्ट्रिय कम्पनी ।
फैलाई दासता भुत्ते पार्दै राष्ट्रिय चेतना
खुट्टाको बदला दिन्छ बैसाखी उपहारमा
लिलामी भाट भाडाका नचाई खुब फन्फनी
सत्ताको स्विच चोर्दै छ बहुराष्ट्रिय कम्पनी ।
अस्तित्व देशको विक्री हुँदै छ नुनतेलमा
सार्वभौमिकता ऐले चढेको छ लिलाममा
नफर्के चेतना हाम्रो यस्तो सङ्कटमा पनि
सर्लक्कै देश निल्ने छन् बहुराष्ट्रिय कम्पनी ।
०००
भैरहवा
सीमान्त स्वर (२०८०)