नेपाली हास्यव्यङ्ग्य अनलाइन पत्रिका

कृष्णप्रसाद गौतम :

कोदालो करमा लिएर घरको बारी नखन्दै मजा
छायामा छलिँदै पुछेर पसिना खेती नगर्दा मजा !
कोदो धान कपास आलु अदुवा बाली नलाए मजा
अर्बौँ खर्च गरेर अन्न परको ल्याएर खाए मजा !१।

पठ्ठा मानिस गाउँ वा सहरमा राख्दै नराखे मजा
ठेल्दै बाहिर रेमिट्यान्स परको खाएर बस्दा मजा !
कार्खाना किन चाहियो र अहिले खोल्दै नखोल्दा मजा
उद्योगीसँग नै मिलेर दुनियाँ ठग्दा हुने झन् मजा !२।

जङ्गी संसदमा पसेर सुरिला कुरा गरेको मजा
दोस्राको मत सुन्नु छैन बरु ता उँघी बसेको मजा !
पस्नासाथ छिटै उपस्थिति गरी अन्तै गएको मजा
उफ्री माइक झ्याल मेच खटिया भाँच्दै हिँडे झन् मजा !३।

बाटो घाट बजारमा सुरसिला भाका छरेको मजा
मालाले भरिलो गला, छिनछिनै ताली बजेको मजा !
लावालस्कर होस् सधैँ अधिनमा आफ्नै अहा क्या मजा
तारे होटलको कबाफ मदिरा चुस्की असाध्यै मजा !४।

खर्चै नौ महिना बजेट नगरी साँची बसेको मजा
बर्खाको महिना असार बिचको ठेक्कापटा झन् मजा !
ठेक्का भाइ र जेठुमा अझ परोस्, उम्केर काहीँ नजा
यस्तो औसरमा हिसाब गरिँदा कैल्यै नभाको मजा !५।

सुन्नुस् सज्जन हो ! यहाँ सबतिरै भयो बडाको मजा
सोझाको घरबास जिङ्ग्रिन पुग्यो, भाग्यो कता त्यो मजा ?
नाफाखोरहरू मिली परपरै बाँडेर लिन्छन् मजा
पार्दैछन् मुलुकै धराप र कठै ! यो लोकतन्त्रै धुजा !६।

०००
इटहरी, सुनसरी ।