नेपाली हास्यव्यङ्ग्य अनलाइन पत्रिका

राजेन्द्रप्रसाद अधिकारी :

मात्र गठबन्धनका पात्रहरू फेरिएका हुन्
गठबन्धन त उस्तै र उत्तिकै
अझ, झन् बढी मजबुत भएको छ
मौसम र रङ्हरू फेरिने हुन्
फेरिँदैनन् छेपाराहरू
मात्र समीकरण र भागबण्डा फेरिएका हुन्
प्रवृत्ति त उस्तै र उत्तिकै
अझ, झन् बढी गाढा भएको छ
लेनदेन र मन्त्रालयहरू फेरिने हुन्
फेरिदैनन् विचौलियाहरू
मात्र समय र परिस्थिति फेरिएका हुन्
फूल, पात र हाँगाका रङ्हरू बेग्लै देखिएका हुन्
बदलिएको समय, परिस्थिति र प्रकृति अनुसार
छेपाराका रङहरू परिवर्तन भएका हुन्
आँखा त उस्तै र उत्तिकै
अझ, झन् बढी चम्किलो देखिएको छ
जिब्राहरू उस्तै र उत्तिकै
अझ, झन् बढी लामो देखिएको छ
फूर्तिफार्ती र चञ्चलपना उस्तै र उत्तिकै
अझ, झन् बढी तामझाम देखिएको छ
अर्थात् छेपाराहरू छेपारोजस्तै देखिएका छन्
अर्थात् मौसम अनुसार छेपाराहरूले रङ बदलिएका छन् ।

०००
२४ फागुन २०८०