नेपाली हास्यव्यङ्ग्य अनलाइन पत्रिका

गायत्री लम्साल :

अजम्बरी भि.आई.पी. हरूलाई ३३ क्विन्टल सुन लिएर आओस् ।
अभावले मर्नु पर्र्ने अमीरहरूलाई १२ पोका नुन दिएर आओस् ॥
हरेक वर्ष आउनै पर्ने भएपछि नदौडिकन बिस्तारै आउनु है ।
जति खाएपनि नअघाउने खञ्चुवा मनलाई सियर आओस् ॥

सिङ्गापुर र स्वीजरल्याण्ड मात्र होइन, सबै देश बोकेर आउनु ।
बेइमानको प्रतिष्ठा खोज्ने ढोँगीहरूलाई सलाम ठोकेर आउनु ॥
खुट्टा कमजोर नपार्नु प्रिय नयाँ वर्ष, तिमीलाई कसैले रोक्दैन ।
झ्याउ हुन्छ दिनदिनै दारु पिउन, एकै पटक सबै धोकेर आउनु ॥

मन्त्रीका कूर्ची फालाफाल, सबैलाई पुग्नेगरि बनाएर आउनु ।
बन्द, जात्रा, काण्ड, चक्काजाम जे भए पनि रमाएर आउनु ॥
आफू ठूलो हुनलाई, थुतुनो नै निकै चर्को चलाउँछन् यहाँ ।
ढुक्कसँग एक वर्षको लागि एउटै सरकार समाएर आउनु ॥

प्यारो नयाँ वर्ष छिमेकीको घरमा समृद्धिका पोका फालेर आउनु ।
अँध्यारोलाई अँध्यारो नै हुन दिनु, उज्यालोमा बत्ती बालेर आउनु ॥
हामी निकै शक्तिशाली छौँ, केही नगरि नयाँ वर्ष ल्याउन सक्छौँ ।
मसान्तको राति बाह्र बजे, सुटुक्क- खुसुक्क पाइला चालेर आउनु ॥

०००
स्याङ्जा