नेपाली हास्यव्यङ्ग्य अनलाइन पत्रिका

गायत्री लम्साल :

इमानको फाइदा लिन जान्नैपर्छ,
त्यसको लागि,
बेइमानको झटारो हान्नैपर्छ ।
बेइमान बन्न जानिएन भने ।
आउने कुरा केही आउँदैन,
सित्तैमा पाइने महङ्गा कुरा,
कसैले केही पनि पाइँदैन ।
आफू र आफ्नो भलो गर्नलाई
अरु केही बन्न नसकेर केही हुन्न,
तर,
भएभरको जुक्ति-बुद्धि लगाएर,
बेइमान बन्न जान्नैपर्छ ।
सदाचार र नैतिकतालाई उडाउने,
खुँयत्रो हान्नैपर्छ ।

आफ्नै साथी, बतास बहादुरले
गणितको सुत्र नघोकेर,
बेइमानको सुत्र पढेको थियो ।
त्यसैले,
अहिले हुनमिल्ने भन्दा अझै,
ठुलो मान्छे बनेको छ ।
युगौँयुगलाई पुग्ने,
नगदे र जिन्सी बाटो खनेको छ ॥
उसकै बहिनी बाणी माया,
उसकै बैनी भएर निस्कीइन् ।
यो जमानाको एसईई भन्ने,
सुनको गेट, डि श्रेणीमा क्रस गरिन
अनि त, माननीयका सम्मान
पाएको पाइ छन् ॥
अरुले देख्न समेत नसकेका चिजहरू
उनले खाएको खाइ छन् ।

पहिलेका कुरा,
सोझो औँलाले घिउ आउँदैन,
अहिलेको कुरा,
इमान हुने कसैको जिउ लाउँदैन ।
कुरो भन्ने कुरो निकै सिधा छ हजुर
अलिकति इमान रह्यो भने,
समाजमा कसैले गन्दैनन्,
आइज बस्, एक कप चिया खा,
अँ- हँ कसैले भन्दैनन् ।
एक नम्बरको बेइमान,
बन्न सकियो भने,
राष्ट्रिय मान्छे मात्र होइन,
अन्तरराष्ट्रिय मान्छे समेत बन्न सकिन्छ ।
नमिल्ने र नहुने कामजति सबै,
एक चुड्कीको भरमा गर्न सकिन्छ ।
त्यसैले मेरा सज्जनवृन्द,
इमानदार बन्ने रहर लागेको भए,
बेइमानको फरमुला घोकिहाल्नुहोस् ।
सबैखाल राष्ट्रिय इमान प्रतियोगितामा
अब्बल हुनको लागि,
बेइमानको अमृत रस धोकिहाल्नुहोस् ॥

०००
काठमाडौं