नेपाली हास्यव्यङ्ग्य अनलाइन पत्रिका

प्रेम ओली  ढकलपुरे :

ए सराद्दे बाजे ?
आज एक दिन भए नि
मेरी आमालाई भेटाइ देऊ
आमाको अनुहार देखाइ देऊ
हरेक वर्ष मेरी आमाले नै पाउँछिन् भन्दै
दाल चामल र फलफूल दान माग्छौ
आमालाई नदिएर के आफै राख्छौ ?
आमाको नाममा चढाएका
हरेक कुरा आमाले पाउँछिन् भन्नेले
एक दिन भए पनि आमालाई बोलाई दिन सक्दैनौ ?
एक छिन भए पनि आमा देखाइदिन सक्दैनौ ?
हैन भने किन तिथि र श्राद्ध गराउँछौ
सबै आमाले पाउछिन्र भन्दै किन कराउँछौ ?
ए सराद्दे बाजे
एक दिन भए पनि मेरी आमालाई बोलाई देऊ न
आज आमालाई मुख हेर्नु छ
मेरी आमाको अनुहार देखाइ देऊ न
साँच्चै म आमालाई, बा भन्दा धेरै मिस गर्छु
ए सराद्दे बाजे
खाली आमाको सराद्द गराएर भुलाउँछौ कि
आज आमालाई नि बोलाउँछौ ?
गौ दान गर आमाले पाउछिन्
साडी दान गर आमाले पाउँछिन्
भनेर झुट खेती कति दिन चलाउँछौ ?
तिम्रो मन्त्र, ज्ञान के छ प्रयोग गरेर
एक दिन भए पनि मेरी आमालाई बोलाऊ
नत्र त्यो ठगी खाने भाँडो अब जलाऊ ।
तिमीले न बोलाए पनि मेरी आमा
मेरो मन मस्तिस्कमा सधैं छिन्
सपनीमा भए पनि आएर आशिस दिन्छिन् ।

०००
घट्टेकुलाे, काठमाडाैं