नेपाली हास्यव्यङ्ग्य अनलाइन पत्रिका

विष्णुहरि पौडेल :

गयो शान्ति स्वस्ति प्रगति थलियो ध्वंश मचियो ।
अचानो थाप्तैछन् जिउनु कदरी युध्द रचियो ।
जुधेका छन् साँढे मुलुक निहुँ खोज्ने छ तवर ।
सुनौँ जस्ता छैनन् अशुभकर छन् विश्व खवर ।१।

चढेकोथ्यो राम्रै प्रगतितिर विज्ञान वरद ।
भयो ऐले भष्मासुर छ यसको दैत्य हरक ।
खसाल्दैछन् को को कुन मुलुकमा एटम बम ।
सधैँ धम्की दिन्छन्, कुन दिन जगत् हुन्छ खतम ।२।

खनेका छन् खाल्टो कुन पुरिन पर्नेछ त्यसमा ।
घमण्डी नेताको मति तुजुक नै छैन वशमा ।
जिलेन्सी युक्रेनी विचलित बनाए पुटिनले ।
यहूदी इस्लामी कुन थलिन पुग्छन् कुदिनले ।३।

भिडे दुम्सी काँढे हरिप रिपु क्षेप्यास्त्र अचुक ।
खरानी पार्दैछन् जन धन प्रतिष्ठान समुच ।
चलेका छन् अन्तर्मुलुक र महाद्वीप समर ।
सुनौला त्यो विष्फोटन पनि भरेभोलि खबर ।४।

नसा जित्ने राखे पछि जिउन गाह्रो छ सकस ।
डढेलो झैँ जल्ने अणु बम नपड्कोस् भरसक ।
धरामा बाँच्तैनन् जन, पशु,चरा जीवन बुटी ।
चिता बन्ला धर्ती उभयचर नै बन्छ सुकुटी ।५।

सबै प्राणी मर्छन् जगतभरि फैली विकिरण ।
युरोपेली सोभीयत रुस लडेका किन रण ।
सबै शान्तिप्रेमी मुलुक किन पार्छन् थररर ।
गरून् रक्षा चण्डी, सुमति भरिदेऊ हरिहर ।६।

०००
काठमाडौं