नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
फुलाउँदा फुलाउँदै मन कुन दिन ओइलाई झरिन्छ
पुर्दापुर्दै दुःखका खाडल आफै खाडलमा परिन्छ
पर्खिनु हो कि जिन्दगी भेट्टाउनु पनि हो खै कुन्नि
कुर्दाकुर्दै र दगुर्दादगुर्दै कुन दिन घुप्लुक्क मरिन्छ ।

२.
जता कुल्यायो त्यतै कुलिने मन भन्नु पनि के रहेछ र
खुशी र सुख किनिदैन भने धन भन्नू पनि के रहेछ र
इज्जतका नाममा आफ्नै चाहना र रहरहरू मार्नु पर्ने
मर्नकै खातिर बाँचेजस्तो जीवन भन्नू पनि के रहेछ र ।

३.
जतिसुकै पुकार गरे पनि निदाएको कुम्भकर्ण जाग्दैन
जे जस्तो भुङ्ग्रोमा सेकाए पनि चिसिएको मन तात्दैन
शास्त्र सिद्धान्तका डकार कति डकार्नु हुन्छ पण्डितजी
सिद्धान्तका दाउरा जोरेर मात्रै भाँडोमा जाउलो पाक्दैन ।

०००
भैरहवा