नेपाली हास्यव्यङ्ग्य अनलाइन पत्रिका

हेम अधिकारी :

बधाईं छ
बधाईं नदिनु मूर्खता हुनेछ
त्यसैले दर्जा, शक्ति र क्षमता अनुसारको बधाईं !
ठुला भ्रष्टाचारीलाई झनै ठूलो बधाईं
मझौला भ्रष्टाचारीलाई
बढुवाको बधाईं
र
साना भ्रष्टाचारीलाई
लिस्नु चढ्न सक्ने बधाईं
बधाईं छ, बधाईं

नभ्रष्टाचारीलाई बधाईं दिने हिम्मत छैन
त्यसैले अहिले
साँचेर राखेँ
तर
भ्रष्टाचारीलाई
नदिई रहन सकिनँ
बधाईं ! बधाईं !! बधाईं !!
नभ्रष्टाचारीलाई चैँ
भ्रष्टाचारको शुभकामना
सिकेस्, जानेस्, बुझेस् र गरेस् भ्रष्टाचार
अनि दिउँला अहिले साँचेर राखेको बधाईं
जनता सताई सताई भ्रष्टाचार गरेनौ भने
फेरि पनि दिन्न है बधाईं ।

अनि अर्को बधाईं
जता ताकपर्छ त्यतै ताक्नेलाई
सकेसम्म ताक पारेस्
तिवारी नै तिवारी भेटेस्, गोतामे नभेटेस्
लाजघिन् नमानेस्, ठिकबेठिक नछानेस्
आफ्नालाई हानेस्, बिरन्तरीलाई मानेस्
आफू माउ नबनेस् तर दाउपार्ने बनेस्
गतिलो नगरेस्, अगतिलो नबिराएस्
देश रसातलमा डुबाएस्, जनता थाङ्नामा सुताएस्
सोझो बाटो नहिँडेस्, साथीभाइ नचिनेस्
यस्तै यस्तै कर्म गरेस्, देशजनतालाई मर्म हुने गरेस्
परिवार उचालेस्, घरबार सुधारेस्
बास्
यसपालिलाई यस्तै बधाईं ! साँच्चिकै बधाईं !

०००
दमक, झापा