नेपाली हास्यव्यङ्ग्य अनलाइन पत्रिका

हृषीकेश बराल :

रिक्त हात, आउँदा, भोकले सताइयो
पेट भर्न, पाउँदा, हर्षले रमाइयो ।
मातृ काख, दूधमा, स्नेहले खुशाइयो
भक्तिभाव, सिद्धिँदा, भ्रष्ट भै गनाइयो ॥१

भूमिमाथि, आउँदा, प्राणले चिनाइयो
हुर्किएर, जिन्दगी, नामले पुकारियो ।
यो शरीर, सासको, नाममा बिताइयो
भक्तिभाव, सिद्धिँदा, भ्रष्ट भै गनाइयो ॥२

मांसपिण्ड, पाल्नमा, ध्यान यो लगाइयो
इष्टमित्र, बिर्सिँदै, द्रव्य नै कमाइयो ।
भाइबन्धु, शोषियो, द्वन्द्व झन् बढाइयो
भक्तिभाव, सिद्धिँदा, भ्रष्ट भै गनाइयो ॥३

लाज शर्म, धर्मका, बात यी पचाइयो
पाप पुण्य, बिर्सिँदै, स्वार्थ नै भजाइयो ।
पुत्र पौत्र, पुत्रिका, श्रीमती उठाइयो
भक्तिभाव, सिद्धिँदा, भ्रष्ट भै गनाइयो ॥४

जात गोत्र, खोजिने, मान्यता मिलाइयो
राख्नुहुन्न, बाहिरी, भित्रकै बनाइयो ।
हुन्न भन्न, थाल्छ जो, शीघ्र ऊ हटाइयो
भक्तिभाव, सिद्धिँदा, भ्रष्ट भै गनाइयो ॥५

अन्य मूक, अन्ध छन्, बोल्छ जो सताइयो
फूर्त्तित गर्छ, जो यहाँ, छानियो ठटाइयो ।
न्यायमूर्ति त, जो थियो, गेहमै थुनाइयो
भक्तिभाव, सिद्धिँदा, भ्रष्ट भै गनाइयो ॥६

अर्थतन्त्र, शोषिँदै, बन्धुमा खुवाइयो
दीन हीन, दन्किँदो, अग्निमा जलाइयो ।
हेप्नुसम्म, हेपियो, मस्तले बजाइयो
भक्तिभाव, सिद्धिँदा, भ्रष्ट भै गनाइयो ॥७

ध्वस्त पार्न, जानियो, सप्रिने बिगारियो
मन्त्रमुग्ध, पारियो, फाइदा उठाइयो ।
दिक्क लाग्छ, सम्झिँदा, भन्न यो लजाइयो
भक्तिभाव, सिद्धिँदा, भ्रष्ट भै गनाइयो ॥८

०००
पोखरा-२६, कास्की ।