नेपाली हास्यव्यङ्ग्य अनलाइन पत्रिका

बिन्दु दहाल मूकदर्शक :

ढाँट्छन् सधैँ मुलुकमा अतिचार नेता
बेच्छन् सधैँ मुलुकका युवती र केटा
यस्ता हुँडार धमिरा किन व्यर्थ पाल्छौ
हे बुद्धु मूर्ख जनता कति भोट हाल्छौ ।

पार्छन् सखाप जहिले पनि देश हाम्रो
बाटो विकास नहुँदा धरती नराम्रो
लुट्छन् सधैँ मुलुक यो किन व्यर्थ पाल्छौ
हे बुद्धु मूर्ख जनता कति भोट हाल्छौ ।

हार्नेहरू सदनमा सब तान्न थाल्छन्
राँगो बनी सदनमा नित हान्न थाल्छ्न्
उस्तै सबै हरिप छन् किन व्यर्थ पाल्छौ
हे बुद्धु मूर्ख जनता कति भोट हाल्छौ ।

खाए नदी वनहरू दुनियाँ समाज
पढ्छ्न् तिनै तर लुकी जहिले नमाज
गीता र वेद सबको चरु हाल्नथाल्छन्
यी बुद्धु मूर्ख जनता कति भोट हाल्छन् ।

यो देश रुन्छ जहिले तर छैन चासो
फाल्छन् सधैँ गरिबका घरभित्र पासो
हात्तीहरू अब सधैँ किन व्यर्थ पाल्छौ
हे बुद्धु मूर्ख जनता कति भोट हाल्छौ ।

०००
दमक, झापा