नेपाली हास्यव्यङ्ग्य अनलाइन पत्रिका

गायत्री लम्साल :

मज्जाको खेल, मात्र खेल्न जान्नुपर्छ
कहिल्यै हार्दै हारिँदैन ।
कुरा सिधा छ ।
चलखेल भन्नाले
नगद पैसाको खेल,
अमूल्य धातुको खेल,
बेच्न नमिल्ने तर सजिलै बेचिने
जनावरहरूको खेल,
लुट्न मिल्ने जति सबै नगदेबालीको खेल
यी र यी जस्तै सबै चल सम्पत्तिको खेल ॥

आजभोलि त अझ, चलखेलभित्र
नागरिकता बेच्ने खेल,
नागरिकलाई शरणार्थी बनाएर बेच्ने खेल,
मुलुकको सिमाना बेच्ने खेल,
सबैलाई चलखेल भनिन्छ ।
त्यसैले हो यस खेललाई
राष्ट्रिय खेल मानिएको ।
हजारौँ खेलहरूबाट यसलाई
राष्ट्रिय खेलमा छानिएको ।

आदरणीय मान्यवर,
यस खेलभित्र सङ्गठित अपराध खेलिन्छ ।
मानव बेचविखन खेलिन्छ ।
डनको फुटबल पनि चल्छ,
गनको फायरिङ पनि चल्छ ।
लागुपदार्थ दुरव्यसनी यसैको हाँगो हो
अझ भित्र छिर्दै जाँदा,
अल्छीहरूले खेल्ने खेल,
काम नगर्ने जाँगर भएकाले खेल्ने खेल,
नैतिकता र सदाचार गुमाएका
असल मानिसहरू सबैले खेल्ने खेल
सबैलाई एउटै डालोमा राखेर
राष्ट्रिय खेल चलखेल भएको हो ।
जुन खेल खेले पनि,
हामी सबैलाई चाहिने,
खेल भनेको चल हो ।
चलखेल नै हाम्रो मुलुकलाई
झ्याप्पै समृद्ध बनाउने मल हो ।

हामी सबैले राष्ट्रिय खेलको,
गरिमा बढाऔँ ।
राष्ट्रिय खेलको अपमान नगरौँ ।
गाउँ-गाउँबाट चलखेल खेलौँ ।
बस्ती-बस्तीमा चलखेल खेलौँ ।
गस्ती-गस्तीमा चलखेल खेलौँ ।
आफू र आफ्ना पन्ध्र पुस्तालाई
चल भन्ने कुरो प्रशस्त कमाउँ ।
त्यसैको लागि हामी सबै
यही चलखेल खेल्नमा रमाऔँ । ।

०००
काठमाडौं