नेपाली हास्यव्यङ्ग्य अनलाइन पत्रिका

छविलाल आचार्य :

लुताले थलियो देश, अङ्गमा छ पिलै पिलो ।
निमुखा जनमा यस्ले, पारेकै छ थिलै थिलो ।।
भ्रस्टता कमिसन् तन्त्र, काम हुन्छ ढिलै ढिलो ।
लुते सङ्क्रान्तिले फालोस्,देशमा छ हिलै हिलो ।।१।।

लैजा लैजा लूतो लैजा, अगुल्टो ठोस्नु पर्छ रे !
लूतो फैलाउने माथि, राँको नै झोस्नु पर्छ रे !!
न त मागेर नै दिन्छ, मिलेरै खोस्नु पर्छ रे !
सारङ्गी पेटका ताँती, भाँति छन् पोस्नु पर्छ रे !!२!!

असारे भलमा मात्र, बिकासे मुल फुट्दछ ।
अड्कम् चड्कम् गरी खाने, टाठाको हुल जुट्दछ ।।
लुतो र कोरोना भन्दा, यिनै हुन् मुख्य भक्षक ।
साह्रै छुट्ट्याउनै गाह्रो, को होला देश रक्षक ।।३।।

मान्छे बेच्दछ मान्छेले, तस्करी छ जतातता ।
कस्तो यो राज्य संयन्त्र ? कस्तो यो दण्डहिनता ।।
माफिया तन्त्रले ऐले, देशमा छ हिलै हिलो ।
लुते सङ्क्रान्तीले फालोस, नेपाली जनको पिलो ।।४।।

लूते कुकुर झैँ पूच्छर्, हल्लाई स्वामी भक्त झैँ ।
कलोका भरमा देश, थिल्थिलो छ आशक्त झैँ ।।
खुलेको दिलले हाम्रो, चाड बाड मनाउन ।
सक्रान्ति क्रान्तीमा लागोस्, स्वाभिमानी जनाउन ।।५ ।।

०००
पाेखरा