नेपाली हास्यव्यङ्ग्य अनलाइन पत्रिका

छबिलाल आचार्य :

वर्ग सङ्घर्षको बाटो, घातमा अल्झियो अरे !
राष्ट्र बचाउने नारा कुर्सीमा बल्झियो अरे ॥
हाना हान भयो कुर्सी, सिंहको दरबारमा ।
हाम्रो तन्त्र रमेको छ, नेताको घरबारमा ॥१॥

लोगो भित्र छ यो देश, डोकोभित्र नदी जल ।
स्वाभिमानी भयौँ हामी ? नगरौँ अब खल्बल ॥
फसेको छ प्रजातन्त्र, बिदेशी जाल झेलमा ।
बसेको छ प्रजातन्त्र, कुर्सीको खेल खेलमा ॥२॥

युवाको जोसमा लुक्छ, तान्छ लान्छ विदेशमा ।
प्रजातन्त्र रमेको छ, नेताको झेलखेलमा ॥
शक्तिमा छ प्रजातन्त्र, भक्त भै बाँच्नुपर्दछ ।
बम्बैका कोठीमा हेर, नग्न भै नाच्नुपर्दछ ॥३॥

अत्याचार बलात्कार, तन्त्रको मन्त्रनै भयो ।
कमिसन् तन्त्रको पेवा, प्रजातन्त्र रहिरह्यो ॥
तस्करी माफिया तन्त्र, प्रजातन्त्र उदार भो ।
गणतन्त्र प्रजातन्त्र, दुष्टकै अनुहार भो ॥४॥

बिदेशी मार्ग बन्दैछन, सीमा स्तम्भ ढलाउँदै ।
स्वाभिमानी बनेका छौँ, नेपाली कहलाउँदै ॥
लुत्ते कुक्कुरझैँ पुच्छर, हल्लाइ स्वामिभक्त झैँ ।
कलोका भरमा देश, अडेकोछ असक्त झैँ ॥५॥

न्यायकर्ता भए अन्धा, लङ्गडो अख्तियार भो ।
जो जस्ले मन्त्रणा गर्छन्, तिनैको शब्द प्यार भो ॥
पर -जा तन्त्र भन्दैछन्, जो जस्लाई चुने भयो ।
बिरालो दुधको साँची, राखे जस्तै हुने भयो ॥६॥

सुनमा नुनमा सारा, शक्तिको अनुहार छ ।
जो आफ्नै श्रममा रम्छ, उसैको नित्य हार छ ॥
चाहे भ्रष्ट भनुन् या त, चाहे गुण्डा भनुन् कतै ।
पर – जा – तन्त्रमा ऐले, पैसा बोल्छ जताततै ॥७॥

एक तन्त्री तिनै देख्छु, गणतन्त्रीहरु तिनै ।
सर्पको काँचुली जस्तै, कत्ला फेर्छन ती दिन्दिनै ॥
पर-जा- तन्त्रमा रम्दै, लामो लस्कर् बनाउँदै ।
हाम्रो दिवस यो हुर्क्यो, भित्री आँत गनाउँदै ॥८॥

०००
पोखरा १६, कास्की