नेपाली हास्यव्यङ्ग्य अनलाइन पत्रिका

होम सुवेदी :

हटेको छ इच्छा घटेको छ आस
कतै छैन सन्तोष यो आसपास
सबै धूर्तले गर्न थाले विनास
दुखीको भने देखियो सर्वनास ॥

सुधा प्रेम झर्दैछ आभास हुन्थ्यो
यहाँ देवताको सधैं वास हुन्थ्यो
सबै देव भागे नपाएर वास
यहाँ फुल्न छाडेछ लालीगुराँस ॥

ढलेको छ आस्था भनेको म सुन्छु
सुनी ठेडी ठोकी दुबै कान थुन्छु
कडा पापको झन् बढेको छ रास
त्यसैले यहाँका सबै छन् हतास ॥

यतै भत्किएको उतै भत्किएको
बढी पाप यो देशमै फत्किएको
बुझी यो कुरा बन्द झन् हुन्छ सास
हुने छाँट देखिन्छ यो सर्वनास ॥

चल्यो झन् सुनामी दुखेको छ घाउ
प्रभो डुब्छ यो देश आई बचाऊ
न छन् काम गर्ने न छन् गाँस वास
विदेशीहरूका सबै देख्छु दास ॥

उनैको छ पूजा उनैको छ दाइँ
बुढा गोरुकै चल्छ उस्तै रजाइँ
थलोमा छ फोहोरकै मात्र रास
अरूले बचाएर फेर्दैछ सास ॥

०००
दमक, झापा