नेपाली हास्यव्यङ्ग्य अनलाइन पत्रिका

गायत्री लम्साल :

राम्रा कामकुरालाई
राम्रो होइन भनौँ,
खराब कामकुराहरूलाई
अच्छा छ भनौँ,
साथी हो, असल यसरी बनौँ ।

फलफूल फलाउन
केमिकल धेरै हाल्छन्,
त्यसैले जुस खान बन्द गरौँ ।
माइन्यूटमा निर्णय गरौँ,
विधि, पद्दति र कार्यविधि बनाउन,
सबैजना मज्जाले मिलौँ
अनि सके जति घुस खाऔँ ।
साथी हो, असल यसरी बनौँ ।

जहाँसुकै बहुमतकै कदर हुन्छ,
अलिकति बाँकी रहेको छ भने,
काम गर्ने जाँगर बेचौँ ।
हाम्रा गाउँ-गाउँ र बस्तीबस्तीमा
सित्तैमा लटरम्मै फलेका
छिमेकी देशलाई बाँदर बेचौँ ।
साथी हो, असल यसरी बनौँ ॥

मायाप्रेम भन्ने कुरो,
निकै कम र सिमित हुन्छ ।
निकै ठूलो धक्कु लगाएर
राष्ट्रप्रेम जस्तो, गतिछाडा काम नगरौँ ।
आफ्ना-आफ्ना,
प्रिय र प्रियसीलाई मात्र
जहाँ मिल्छ, त्यही प्रेम गरौँ ।
साथी हो, असल यसरी बनौँ ॥

०००
स्याङ्जा, हाल काठमाडौं