नेपाली हास्यव्यङ्ग्य अनलाइन पत्रिका

हेम अधिकारी :

खुबै घमण्ड गर्थिस्
के के न गर्छु भन्थिस्
यो त्यो, यता त्यता, उता, कता कता
के के न लछारेँ भन्थिस्
नापिछस्

एउटा घर नामको क्वान्द्रोभित्र
कुकुल्ढुक नाथे जिन्दगी !
कत्रा गफ! कत्रा कुरा !
ह्याँ र त्याँ उफ् !
सोह्र अठार घण्टा खटेको ध्वाँस पिट्थिस्
यति कमाएँ, उति कमाएँ
यत्रो पद, उत्रो पद
कति कति प्रतिष्ठा सम्मान,
पगरी र पुरस्कारका हण्डा
अनेक जितका नानाथरीका फण्डा
खालै सारिछस् !

दिउसो कमाइस्
राति झन् कमाइस्
कता कता पनि थमाइस्
जसरी पनि कमाउनमै रमाइस् ।
कालोधन, सेतो, पहेँलो, निलो हरियो धन्
खै कस्तो धन थुपार्ने मन

आखिर
एउटा कृत्रिम कोठरीको भरोसामा कैदी,
लुखुरे, इस्
नाथे जिन्दगी !

शिक्षाको रवाफ
हसुरेको कवाफका गफ
संसार जित्ने मात लागेका हाँक
लुरुक्क भर पर्ने त आखिर त्यही रहेछ छाक ।
गाई, भैँसी, पानी, पँधेरोभन्दा
घरगोठ, लेकबेँसी, हलोकोदालोभन्दा
उच्चता प्राप्तिको फुईँ
यी सबै देखियो आज ताईँ न तुईँ
डङ्ग्रङ्ग, थामिईस् भुईँ लछारिस्
नाथे जिन्दगी !

ए जिन्दगी !
संसार हल्लाउँदै थर्काउँदै
यो मात्रै होइन
अर्को धर्ती पनि जित्ने ख्वाब खै दिन गन्न मातरै?
आखिर एकमुठी सास कन्न ।
नाथे जिन्दगी ।

०००
दमक, झापा