नेपाली हास्यव्यङ्ग्य अनलाइन पत्रिका

पदम दाहाल :

सिक्सिको चक्चके चाला विश्वब्रह्माण्ड यो तला
छिप्छिपे छुक्छुके धन्दा धन्य मानिसको कला ! ।१।

धर्मभित्र फसाइन्छ सिक्सिकै छ जलाम्मय
कर्मभित्र रमाएको मान्छे को छ र तन्मय ? ।२।

बिधर्मी जन पाखण्डी दारी केश सजाउछन्
झुसे झुसिल्किरा कोरा पापिष्ठ अथुलाउछन् ।३।
भूराजनीति भूभार टोकसो छ जता पनि
दलाली खिल जञ्जाल कष्टकारी जता पनि ।४।

भूखण्ड खण्ड नेपाल पढूँ पहाड खोंच छन्
मान्छेका दिल बिन्दास सिक्सिकोमय सोच छन् ।५।

छिमेकी राल काढेर हाली मुहाली खोज्छ ऊ
सक्सकाएर सिक्सिको मझेरीनिर पुग्छ ऊ ।६।

जातजाति खुराफाती गोल बस्ती उचालिँदा
भेद विभेद औंल्याई नौटङ्की रचना फुँदा ।७।

सिक्सिको छ हिलोमैलो धिप्धिपे छ जुनी यहाँ
सकार्न सक्छ खै कस्ले मान्छे नै छ खुनी यहाँ ।८।

सिक्सिको तुल्बुलाएसि जाऊँ काहाँ भनिन्छ र ?
घिड्घिडो मनको धोको कैले सम्पूणर् हुन्छ र ? ।९।

जन्मभूमि थलो आफ्नै बिर्सिदैन कहाँ झरूँ ?
अजीणर् तन भै घृणा उब्जिएको छ के गरूँ ? ।१०।

सिक्सिकाउँछ रे मान्छे खट्पटाउँछ यो मन
फिट्फिटाएर बाँच्तैछु भत्भताउँछ जीवन ।११।

देखेर सुख अर्काको मान्छे मर्छ जलीकन
फलानो दुखिया भन्छन् कस्को दुख्छ र जीवन ? ।१२।

शोक सन्तप्त भोग्दैछ होस बेहोस मानिस
दायित्वबोध दिग्भ्रान्त बास खोज्दैछ मानिस ।१३।

०००
मादी न.पा. ६, सङ्खुवासभा,
हाल, लोकन्थली, भक्तपुर ।