नेपाली हास्यव्यङ्ग्य अनलाइन पत्रिका

ईश्वर पोखरेल

पहिले डेटिङ्का फोटा
अनि इन्गेजमेन्टका फोटाहरू
अनि म्यारिजका फोटाको लामो श्रृङ्खला
अनि हनिमुनका शर्मनाक र अर्ध-शर्मनाक फोटाहरू
फेसबुकमा र इस्टाग्राममा
पोस्ट हुँदाहुँदै
हामीले हेर्दाहेर्दै
ती फोटाहरूलाई उछिनेर
डिभोर्सको प्रोसेस
शुरु भएको हल्ला
हतार हतार आइपुगेको छ— हल्लाबजारमा ।

यति हतारमा यस्ता हल्ला
पत्याउन कसैलाई मन छैन ।

लौ न
केही समयअघि मात्र
उत्साहका साथ सम्बन्ध गाँस्ने युवायुवतीहरू
केको अभावमा
वा, के बढी भएर
वा, के गडबड भएर
वा, केको हतारमा
यसरी
हतारहतारमा
एकअर्कासँग
यस रितले
उक्ताउने गरेका छन् हँ !

०००
बोजेपोखरी, ललितपुर