नेपाली हास्यव्यङ्ग्य अनलाइन पत्रिका

आर. आर. चौलागाईं :

सूचना ! सूचना !! सूचना !!!
को किन्न आउनहुन्छ ?
आउनोस्
मेरो मन्त्री पद बिक्रीमा छ ।

अहिले त घाँस पनि मन्त्री
झार पनि मन्त्री
पत्कर पनि मन्त्री
रुखको बोक्रो पनि मन्त्री
आची पुछेर फालेको ढुङ्गो पनि मन्त्री
मकैको खोस्टो पनि मन्त्री
तुन्द्रुङ्ग झुन्डिएको केराको बुङ्गो पनि मन्त्री ।

अहिले त सिँगान पनि मन्त्री
खकार पनि मन्त्री
कतै नबिक्ने थोत्रो सिलाबर पनि मन्त्री
भाँडा मस्काउने खरानी पनि मन्त्री
टोले गुण्डा पनि मन्त्री
नेताका झोला बोक्ने झोले पनि मन्त्री
जनतालाई भुक्ने र टोक्ने भुस्याहा कुकुर पनि मन्त्री ।

पैसा कमाउन मलाई मन्त्री हुनु पर्दैन
एउटै इसारामा म लाख करोड कमाउन सक्छु
कोहीले डेढ करोड दिने भनेका छन्
कोहीले तीन करोड दिने भनेका छन्
मेरो मन्त्री पद लिलाम बढाबढमा छ
जसले मलाई बढीभन्दा बढी दिन सक्नुहुन्छ
उहाँले नै मेरो मन्त्री पद लान सक्नुहुन्छ
सूचना ! सूचना !! सूचना !!!
को किन्न आउनहुन्छ ?
छिट्टै आउनोस्
मेरो मन्त्री पद बिक्रीमा छ ।

०००
२०८१ भदौ १८
हेटौंडा, मकवानपुर