ह्वाँको वृद्धकाल

ह्वाँको वृद्धकाल

अब बेला भो बुद्धि आउनुपर्छ पाएसम्मको मिठो मसिनो खानुपर्छ सकिन्छ भने धर्म कमाएर माथि जाँदा लानुपर्छ सोच्तै हुनुहुन्छ मनमा उठेका इच्छालाई टार्नुपर्छ

होम सुवेदी

होम सुवेदी :

हिजो दारुविना छाक नटर्ने
घर छाडेर वरपर चर्ने
मालपोतको फोकटको माल
जथाभावी छर्ने
ह्वाँको जीवनमा पनि
बुढेसकाल लागेको छ
जवानीको जोस भागेको छ
संस्कारको भोक जागेको छ
यसैले अहिले उहाँलाई
साँझबिहान
घन्टी बजाउन मन लागेको छ
ह्वाँका अन्तर्आत्माले पनि
धर्मको बटो मागेको छ
बुढेस काल न हो
दाँत झरिगए
रमाइलो गर्ने इच्छा मरिगए
त्यसैले अब
जिउले सहनेसम्मको
झोल मात्र खानु पर्छ
चोक्टालाई छाडेर
धर्ममा मन जानुपर्छ
चन्दन लाउनु पर्छ
भजन गाउनुपर्छ
मन्दिर धाउनुपर्छ
अब बेला भो
बुद्धि आउनुपर्छ
पाएसम्मको
मिठो मसिनो खानुपर्छ
सकिन्छ भने धर्म कमाएर
माथि जाँदा लानुपर्छ
सोच्तै हुनुहुन्छ
मनमा उठेका इच्छालाई टार्नुपर्छ
अलि पर सार्नुपर्छ
आफूलाई बैतरणी तार्नुपर्छ
अबको जिन्दगी सुधार्नुपर्छ ॥