नेपाली हास्यव्यङ्ग्य अनलाइन पत्रिका

गायत्री लम्साल :

संसारकै सर्वोत्कृष्ट हामी
पैसासँग मत साटेर
दुई नम्बरी नेता छान्न सक्छौँ ।
जसले नसक्ने र नहुने काम गर्छ
उसैलाई अजम्बरी मान्न सक्छौँ ।

आफू भन्दा अरु असल भेट्दै- भेट्दैनौँ ।
अरुको प्रगतिको डाह लाग्छ,
आफ्नौ हैसियत हेर्दै- हेर्दैनौँ ॥
कृषि क्रान्तिमा छलाङ् मार्दै,
खाद्यान्न आयात गरी,
आफ्नै नागरिकलाई निर्यात गर्छाैँ ॥
काम नगर्ने रातारात अमिर अनि
दश नङ्ग्रा खियाउने भोकै मर्छाैँ ।

अरुको होइन हजुर,
हाम्रै शक्ति अपरम्पार छ ।
जसले इमान र सदाचारलाई माया गर्छ
उसलाई त आफ्नै घरमा समेत छेकबार छ ॥
अल्छिको मूल्यले सगरमाथा चढ्यो हजुर ।
श्रमको मूल्य त केवल भार छ ॥

आहा हामी,
हाम्रो गुणगान कसैले गाउनै पर्दैन ।
अरुका कुरा काट्न र कुरा लाउन पाएपछि
इनर वयर समेत लाउनै पर्दैन ॥
नीति र नैतिकताको विक्री बजार
घर-घरमा फस्टाएको छ ।
संस्कार र सभ्यता भन्ने कुरो
कसैलाई नचाहिने गरी अस्ताएको छ ॥

०००
स्याङ्जा, हाल काठमाडौं