नेपाली हास्यव्यङ्ग्य अनलाइन पत्रिका

विदुर अधिकारी :

चोरी भो कविता निबन्ध र कथा, सङ्गीत चोरी भए
चोर्ने मानिस भद्र सन्त गनिँदै, सञ्जालमा देखिए
यस्तै मानिसको हुँदा बिगबिगी, गिर्दो सदाचार छ
लुच्चा सर्जक नै बडा ठहरिने, संयन्त्र बेकार छ ।६१।

सिङ्गो जीवनको बयान नभए, आख्यान बेकार छ
बुझ्दैनन् यदि सत्य तथ्य जनले, व्याख्यान बेकार छ
पीडाको यदि बास हुन्छ मुटुमा, झङ्कार बेकार छ
सारा इज्जत नै कलङ्कित भए, शृङ्गार बेकार छ ।६२।

सग्लो संस्कृति, क्रान्ति हाँक्न नसके, लेखेर के सार छ
चिर्दै ती भ्रमजाल च्यात्न नसके, साहित्य बेकार छ
आत्मा भित्र प्रभाव पार्न नसके, बोलेर के पार छ
छाडा संस्कृति ती उधार्न नसके, साहित्य बेकार छ ।६३।

साह्रै नै मदमत्त भै नगरमा, हाँसेर के सार छ
छाडातन्त्र सहर्ष धारण गरी , हिँड्छौँ त बेकार छ
मात्रै भाषणमा प्रलोभित भई, भुल्छौँ त बेकार छ
भ्रष्टाचार विरुद्ध युद्ध नगरी, डुल्छौँ त बेकार छ ।६४।

मोतीबिन्दु छ किन्तु औषध भने दिन्छन् यहाँ वातको
लोभी डाक्टर,माग्छ दस्तुर अझै, जालो बुनी घातको
यस्तै चाल सदैव नै रहिरहे, सद्भावना मर्दछ
मान्छे भैकन मर्म बुझ्न नसके, बाँचेर बेकार छ ।६५।

०००
भरतपुर महानगरपालिका-१९