नेपाली हास्यव्यङ्ग्य अनलाइन पत्रिका

लक्ष्मण नेवटिया :

प्याट् प्याट् पिटेर,
चुना लाएर हत्केलामा दलेर,
चट्ट ओठमुनि च्यापेर ,
तृप्तिको स्वाद लिए झैं,
छ्यास्छ्यास्ती ,
पसलहरूमा भेटिने,
प्रेम कुनै सुर्ती त.. होइन।

आत्माभिव्यक्ति हो प्रेम,
भावाभिव्यक्ति हो प्रेम,
विभक्ति होइन, राधाकृष्णभक्तिको
अभिव्यक्ति हो प्रेम।
थरी थरी फूलमा भन्किएर
आनन्द लिने भमरा झैं
प्रेम कुनै वासना पूर्ति त… होइन।

प्रेम वर पिपलको
शान्त शीतल छायाँ हो
प्रेम प्रेमिलमा भरपुर
अगाडि पछाडि, दायाँबायाँ हो।
प्रेम कठिन तपस्या हो
पाउन प्रेमिललाई,
छद्मभेषमा झट्ट गएर
उनको आँगनमा
लाइदिने घाँटीमा माला
प्रेम कुनै मूर्ति त… होइन ।

०००
विराटनगर