नेपाली हास्यव्यङ्ग्य अनलाइन पत्रिका

गायत्री परिराेशनी :

दुई दशक पहिला
तिवारी काकीले भन्नुभयो,
नानी मुखभित्रको प्वाल
निकै खञ्चुवा छ ।
गैरीखेत यसैले खायो,
तिलहरी, ढुङ्ग्री, नौगेडी समेत
केही बाँकी राखेन ॥

बीस हलले जोत्ने
पाखो बाली खायो ।
खसी, बोकाले काम चल्दाचल्दै,
दुई खुट्टे र बाँकी चारखुट्टे सबै खायो ॥
अँ-हँ, जति खाए पनि पटक्कै अघाउँदैन ।
हो, साँच्ची काकीको कुरा
अहिले त झन् सान्दर्भिक छ ।

हाम्रो मुखभित्रको प्वालले,
तीन पानेको जुसभन्दा बढी
सित्तैमा झ्याम्म आउने घुस रुचाउँछ ।
सबैभन्दा आफूलाई उत्तम बनाउने
आडम्बरको भुस रुचाउँछ ॥
अलिकति बाँकी पायो भने,
रिति खान्छ, थिति खान्छ,नीति खान्छ ।
सदाचार र नैतिकता खान्छ ॥

भ्रष्टाचार भन्ने उत्तम अचारलाई
जहाँ, जसरी, जहिले मिल्छ
त्यहाँ, त्यसरी, तहिले खान्छ ॥
अँ-हँ अघाउने कुरामा कहिल्यै
थाक्दै – थाक्दैन ॥
छानबिनको रसवरी,
उसकै मुखमा सकुञ्जेल कोच्दा समेत
अलिकति समेत फाट्दैन ।
सधैँभरि ताजा-ताजा अनि
नयाँ-नयाँ स्वादका खान रुचाउँछ ।
हामी सबैको मुखभित्रको प्वाल ॥

०००

स्याङ्जा