नेपाली हास्यव्यङ्ग्य अनलाइन पत्रिका

हाेम सुवेदी :

कति दुःख थियो मैच्याङ्लाई
छोराछोरी हुर्काउन
गाईबस्तु फुकाउन
बिस्कुन सुकाउन
घाँस काट्न र भारी बोक्न
भात पकाउन
खुवाउन प्याउन
तर अब यो सब केही छैन
उ बेला मैच्याङ्ले दुख पाएकै हो
तर आज हाइसन्चो छ
गणतन्त्र ता आएकै हो
भिमसिने बोको गनाएकै हो ।

हुर्किएको छोरो घरमा के बसोस्
आफ्नै मान्छे मार्न
जङ्गलमा किन पसोस्
छोराले कतारबाट बोलाएकै हो
गणतन्त्र ता आएकै हो
भिमसिने बोको गनाएकै हो ।

सिफारिस लिन चारो छर्नै पर्छ
राष्ट्र सेवक हो बाबै राष्ट्रसेवक
उसले तलबमा मात्र कता काम गर्छ
सरकारी कार्यालयमा दिउसै रात पर्छ
विना चारो न यताको फाय उता
न उताको फायल यता सर्छ
को जनता भनाउँदाको काममा मर्छ
चारोको लाठो बेगर कामको फल थोडै झर्छ
तब पो सरकारी राष्ट्रसेवकले काम गर्छ
अहिले पनि रामस्वरुप धाइरहेको छ
उहिले पनि रामस्वरूप कार्ज्यालयमा धाएकै हो
हामीले राजा फालेर
होलिवाइनको देउता बोलाकै हो
साँच्चै भन्छु धरो धर्म
नेपालमा गतिलो गणतन्त्र आएकै हो
भिमसिने बोको गनाएकै हो ।

कसैले शङ्का नगर्नू
हाम्रोमा गतिलो गणतन्त्र आएकै हो
भिमसिने बोको गनाएकै हो ।

०००
भद्रपुर, झापा