नेपाली हास्यव्यङ्ग्य अनलाइन पत्रिका

भाेजराज  रेग्मी मुखाले :

तँलाई काँधमा बोक्ने आज म अक्करेभीरमा छु
र पनि तँलाई बिन्दास देखेर म साह्रै पीरमा छु
मैले पुल्पुल्याएको ए, मेरो सरकार !
तेरै बुद्धि पगाल्ने गरी
मेरो पीर पखाल्ने गरी
एकफेर भए पनि गड्गडाएर हाँसी दे ।

तँ कुम्भकर्ण निदाइरहन्छस्
म घचघच्याइरहन्छु तँलाई
तँ गलगिद्ध हुन्जेल घिचिरहन्छस्
भुँडी फुटेर मर्लास् भनेर
म कराइरहन्छु तँलाई
सरकार ! म साह्रै खराब छु, मलाई फाँसी दे !

सरकार,
तैँले लामो हात गरेको पनि मलाई चित्त बुझ्दैन
तैँले आँखा तरेर हेरेको पनि मलाई मन पर्दैन
तुइनमा झुण्डिएरै पनि तेरै जिन्दावाद गर्नेहरूलाई
भ्युटावरबाट आँखा च्यातेर हेर्छस् र मक्ख पर्छस् तँ
तेरो ताल देखेर मेरो आक्रोशको हिमताल फुट्न खोज्छ
र, त्यही ताल फुट्ला र आफ्नो सर्वस्व बगाउला कि भनेर
ठूलो बाँध हाल्न मालिकहरूसँग लुब्ध हात पसार्दैछस् तँ

र, म तँलाई खबरदारी गर्दैछु
तँचाहिँ मसँग खातिरदारी खोज्छस्
ए , मेरो पात्तिएको सरकार !
म साह्रै खराब देखिएँ, मलाई फाँसी दे !

०००
भक्तपुर