नेपाली हास्यव्यङ्ग्य अनलाइन पत्रिका

भोलानाथ सुवेदी :

यिनीहरू खान जन्मेका हुन्
खान्छन्
कोही हाँसेर खान्छन्
कोही रोएर खान्छन्
कोही धोएर भन्छन्
नारा लगाएर खान्छन्
दारा किटेर खान्छन्

खानकै लागि लाल सलाम आउँछ
खानकै लागि जय नेपाल आउँछ
खानकै लागि राजावादी हुन्छन्
खानकै लागि गणतन्त्रवादी हुन्छन्

अनेक चटक गरेर
रूप रङ धडेर
खाना आएका छन्
यिनीहरु सित्तै पाए भने
भोक नभए पनि
बान्ता नहुन्जेल खान्छन्
अर्काको भाग खोसेर खान्छन्

रोग नभए पनि
रोगी बनेर खान्छन्
माग्न नसके जोगी भनेर खान्छन्
यिनीहरू गोजी भर्न आएका हुन्
घुमाएर मिलाएर खान जानेका छन्

कोही क्वाप्प खान्छन्
कोही सुलुक्क निल्छन्
जति खाए पनि
डकार छोड्दैनन्
बिगार आफ्नै भएपनि
दोष अरुलाई थुपार्छन्

यिनीहरू
योजना बनाएर आएका छन्
दिए मिलाएर खान्छन्
नदिए रिसाएर खान्छन्
उघारेर खान्छन्
उधारेर खान्छन्
जे जसरी भएपनि
यिनीहरू खानकै लागि
जन्मेका हुन् खान्छन् ।

०००
(९८४३०५४१६१)
ओखलढुङ्गा