नेपाली हास्यव्यङ्ग्य अनलाइन पत्रिका

सुरेशकुमार पाण्डे :

सबैखाले तानाशाहको विरोधमा लगातार सङ्घर्ष गरेका, देश र जनताका लागि अहाेरात्र खटेर सेवा गरेका, महान समाजसेवक तथा त्यागमूर्ति वीर व्यक्तित्व। जसले कहिल्यै पद प्रतिष्ठाको लागि दुनो सार्नु भएन । यस्ता व्यक्तिलाई सम्मान् गर्नुपर्दा हाम्रो संस्था गौरवान्वित छ।”

मञ्चबाट प्रशंसाको ओहिरो लाग्दा हाउस्मा बसेका दृघविक्रमको छाती चाक्लो भयो। जोस कता हो कता झनै बढ्यो । आन्दोलनमा दुबै खुट्टा गुमाए पनि बिना बैशाखी दौडौँ-दौडौँ भयो।

सिमानामा गएर देशको रक्षा गर्ने मनमा आँट पलायो।
राणाको विरूद्धमा लड्दा उसले आफ्नो बाबा गुमाएको हो । राजतन्त्रको विरूद्धमा लड्दा आफ्नो परिवार मात्र होइन आफ्ना दुबै खुट्टा समेत गुमाएको दृघविक्रम मञ्चबाट प्रशंसा सुन्दा सबै घाउहरू निको भएको अनुभूति भयो। ऊ मनमनै प्रशन्न भयो।

“उहाँ सम्मानकाे योग्य वीर लडाकु हुनुहुन्छ दौलतरामजी कृपया सम्मान ग्रहण गर्नुहुन अनुरोध गर्दछु ।”- उदघोषकले दौलतरामलाई मञ्चमा बोलायो। जसले आन्दोलनकै दौरान लुकेर दृघविक्रमलाई बम प्रहार गरेको थियो ।

०००
घोराही- १८, दाङ