नेपाली हास्यव्यङ्ग्य अनलाइन पत्रिका

भलादमी भोला :

चिहानमा पुर्‍यायौँ भने
फेरि उहीसँग डराउँयौँ भने
आफूलाई बाघ सम्झेर
सिकार खोज्न हिँडेकाहरू
स्यालको हिडाईमा डरायौं भने
घरी आशीर्वाद दिने
देवता सम्झन्छन्
घरी फैसला सुनाउने
न्यायाधीश बन्छन्
नाटकका पात्र जस्तो
रूप परिवर्तन गरेर
घरी सत्तो श्राप गर्छन्
घरी टाउको जुधाएर
मित लगाउँछन्
चाहिने पनि गर्छन्
नचाहिने पनि गर्छन्
आफैँ चिहानमा पुर्‍यायौँ भन्छन्
आफैँ चिहानसँग डराउँछन्
यिनीहरूलाई
जिउ कन्याउन खेतालो चाहिन्छ
सालीको नन्दको छोराको
पास्नीमा जान
सरकारी गाडी चाहिन्छ
सरकारी ढुकुटीमा
लामो हात गर्ने आफन्त चाहिन्छ
यिनीहरूलाई अब
रेल चाहिन्छ रकेट चाहिन्छ
पानीजहाज कार्यालय खोलिसके
पियन र हाकिम तोकिसके
तलब पनि महँगो दिएकै छन्
समुन्द्र नभएर के भो
जहाज नभएर के भो
देशको ढुकुटी रित्याउनु छ
कान्लै पिच्छे भ्युटावर
ठड्याउनु छ
समृद्धि ल्याउन नयाँ गर्नु छ
मुर्दावाद गर्नेलाई जेल छ
जिन्दावाद गर्नेसँग मेल छ
देश धमिरा भइ खाएपछि
केही भन्न निहुँ चाहिन्छ
अघिपछि लाग्ने जिउ चाहिन्छ
खरानी दलेर आएपछि
अब उनीहरूलाई पनि
उही चिहान चाहिन्छ।

०००
(९८४३०५४१६१)