नेपाली हास्यव्यङ्ग्य अनलाइन पत्रिका

घनश्याम रेग्मी :

होली खेल साथीहरू अझै होली खेल
पारिबाट मगाएर लोला गोली खेल
सारा पैसा रित्याउँदै छिमेकी त्यो पोस
पालैपालो भागशान्ति आलु पोली खेल ।१
•••
सियो धरि बन्नु छैन करोडौंको रङ्ग
चाइनाको पेचकारी किन पर्नु दङ्ग
यस्तै यस्तै चाडपर्व थप्न पाए केही
व्यापारमा नाफा गर्ने पुग्थ्यो हाम्रो ढङ्ग ।२
•••
रगतका होली खेले कति जना मारे
बैङ्क लुटी अर्बौं अर्ब आफैँ झ्वाम्म पारे
मिठा मिठा नारा दिए देश बनाउने
आफ्ना भाइ भतिजो र साला अघि सारे ।३
•••
ठेक्का पट्टा आफ्नालाई डोजरको काम
जङ्‌गलका सिमलका रुख तिम्रा नाम
हिजो पूजा गर्न रोक्यौ आज भक्त बन्छौ
माक्र्स माओ लेनिनले पाए कति दाम ।४
•••
सर्वहारा मोटरमा गुडेका छन् आज
चौबीसेका राजा यिनी चलेको छ राज
पार्टी हुन्छ होटेलमा करोडौंको बिल
चल्ला हामी जनता हौँ नेता भए बाज ।५
•••
०००
हाल: बैजनाथ १, चिसापानी, बाँके