नेपाली हास्यव्यङ्ग्य अनलाइन पत्रिका

शम्भुप्रसाद गजुरेल :

नेता पिडक हो भन्ने, हल्ला हुन्छ सधैं तर
भेडाको हुल झैँ आफै, लाग्छन् पछि निरन्तर ।

डोरो मालिकले तान्छ, नाच्दछन् पुतली बनी
प्रभुको पाउमा तालु, राख्दछन् जय होस् भनी ।

जान्छन् कुमार यात्रामा, गणेश चाकरीतिर
जित गणेशको पक्का, हार्छन् कुमार आखिर ।

आशीर्वाद लिने होड, मच्चिन्छ जब तोडले
क्रान्तिका पथ भत्किन्छन्, कुर्लिन्छ दैत्य जोडले।

स्वाभिमान सँगै बोक्ने, बानी छैन कठै अब
परजीवी बनी बाँच्ने, जुका जुम्रा बने सब।

असन्तुष्टि भयो मौका, सत्य बिचार मारियो
लुकाएर सबै नौनी, बोसो सर्लक्क खारियो।

अगेनामा बसेकाले, शुद्ध घिउ भनेपछि
बोसोको घिउ चोखो भो, मान्छे लास बनेपछि ।

०००
काठमाडाैं