नेपाली हास्यव्यङ्ग्य अनलाइन पत्रिका

लक्ष्मण नेवटिया :

मेरा व्यथा अनेक कथा छन् अनन्त,
दगुर्नु पर्छ हुँइकिएर अर्द्धरात्रि प्रयन्त ।
जिन्दगी बाँच्दैछु अनिश्चिततामा,
छैन मिठास, छ जीवन तिक्ततामा।

चाहनाहरूको चहक छ तपाईंको द्वारमा,
हाम्रो जिन्दगी बित्छ यस्तै ख्यार ख्यारमा,
यहाँ असमानता भरिएको भाव विचारमा,
गाह्रो थपिदै गइरहेको छ हाम्रो रोजगारमा।

हो म आफू भोको छु त के भयो दगुर्छु,
मेटाउन यहाँको भोक खाना पुर्‍याउँछु।
म टन्टलापुर घाममा, तपाईं आराममा,
मोटरसाइकिलमा बेग बोकेर काममा।

हवाहुरी घामपानी सबै सहन्छौं,
इच्छा पुर्‍याउन तपाईंको घर पुग्छौं।
हो तलब पाइन्छ पसिना निकाली
अलिकति कमी रहँदै खान्छौं गाली।

तपाईं दशैं तिहारमा उत्सवको मोजमा,
हामी थिचिएका थप कामको बोझमा।
जब म फँस्छु बाटोबीच ट्राफिक जाममा
काटिन्छ पैसा ढिलो पुर्‍याएको नाममा।

तपाईं बाँच्नुस् जीवन तडक भडकमा
पुर्‍याउन अर्डर हामी जतिबेला सडकमा ।
छोराको स्कुल फीस तिर्नु छ, सम्झन्छु
अर्डर बोकेर पिठ्युँमा हतारमा लम्कन्छु।।

यहाँको छोराको लागि केक लिएर आउँछु
आफ्नै छोरीको बर्थ डे- कहाँ भ्याउँछु ?
हाम्रा डेलीभरी ब्वायको कथा छ विचित्र
जस्तो जे देखें कोरेको छु यो “व्यथा-चित्र” ।

०००
विराटनगर