नेपाली हास्यव्यङ्ग्य अनलाइन पत्रिका

डिल्लीप्रसाद मूलतिहुन :

दहीलाई दशा लाग्यो भन्ने खबर पाइयो
दहीभन्दा समाचार पढ्दा चाँडै अघाइयो।१ ।

दही मध्य हिजोसम्म जेठो भक्तपुरे थियोे
दशालाग्यो उसैलाई बाठो भएर बिग्रियो ।२ ।

दशा बाजा बजाएर उसैका घरमा पस्यो
दह्रो भक्तपुरेलाई पाता फर्काउँदै कस्यो ।३ ।

दहीको कतरा जम्मै लानेभो यमलोकमा
दयालु पसले आज डुब्यो चुर्लुम्म शोकमा ।४ ।

दही हो जिन्दगी मेरो उसैको आज यो गति
दया गर्दै म आफैले ख्वाएँ विषाक्त ओखती ।५ ।

दशाले दूधमै घेरा हाल्यो भन्छन् सबैतिर
दहीको हाल बेहाल पार्ने कोको छ माहिर ।६ ।

दूधसँगै मिल्यो पानी यहीँबाट दशा सुरु
दशा ल्यायो रुपैयाँले आए नयाँ कथाहरू। ७।

दशा लाग्दै नलागेको आजसम्म दही थियो
दहीकै दुर्दशा देख्दा मान्छे चिन्तित देखियो ।८ ।

दहीमा चिउरा मिल्थ्यो ग्रहदशा मिलाउँदा
दशा लाग्यो दहीलाई मिल्न खोज्दैन भेटिँदा ।९।

दशामा पसलेसम्म मुछिएछन् कठैबरा
दही कागजको हुन्छ कुरा उत्तम छैन र ।१०

०००

चाँगुनारायण, भक्तपुर