नेपाली हास्यव्यङ्ग्य अनलाइन पत्रिका

लक्ष्मण नेवटिया :

कहिले बिउ हुन्छ समय,
कहिले बिरुवा,कहिले कोपिला
कहिले ओरालो कहिले उकालो
अविरल बगिरहेको नदी झैं
निरन्तर यात्रामा रहन्छ समय।

कहिले अनुकूल हुन्छ समय,
कहिले प्रतिकूल हुन्छ समय,
कहिले गोरेटो कहिले पक्की बाटो
कहिले दोबाटो, कहिले चोबाटो।
अविरल बगिरहेको नदि झैं
निरन्तर यात्रामा रहन्छ समय।

समय कहिले सुनौलो बिहान
समय कहिले सन्ध्या सुनसान
छेक्न सकिंदैन छलबलले उसको
अनवरत यात्रा सधैं गतिमान।
अविरल बगिरहेको नदि झैं
निरन्तर यात्रामा रहन्छ समय।

जसले गर्छ उसमाथि विश्वास
उसलाई कहिले पनि गर्दैन निरास
खुट्टा छैन तैपनि मजाले दौडछ।
उ त गयो जसले साथ छोड्छ।
अविरल बगिरहेको नदि झैं
निरन्तर यात्रामा रहन्छ समय।
मानिसको भाग्यलाई हाँक्दै
उसको चाहना माथि सधैं
समयले चिप्लेटी खेल्छ।

०००
विराटनगर