उत्तमकृष्ण मजगैयाँनेपाल हेर्न विदेश जाऔँ
गोरखाली चिहानहरू उतै लाहुरे र दरबानको रूपमा देशभक्त महानहरू उतै सीप उतै, बुद्धि उतै रगत उतै, पसिना उतै पहिचान खोज्न उतै जाऔँ नेपाल हेर्न विदेश जाऔँ ।
उत्तमकृष्ण मजगैयाँ :
हाम्रो देशको पहिचान
आजभोलि विदेशमै सरेजस्तो छ
अब त्यहीँ गएर खोज्नुपर्छ हाम्रो देश ।
हिँड, हामी त्यतै जाऔँ
नेपाल खोज्न विदेश जाऔँ ।
नेपालको सन्दर्भमा
सेमिनार, गोष्ठीहरू उतै
हाम्रो विकासका लागि
योजना बन्ने पनि उतै
मन्त्री-सांसद् गइरहेकै छन्
हिँड, हामी पनि जाऔँ
नेपाल बुझ्न विदेश जाऔँ ।
नेपालका देवीहरू उतै
नपत्याए दिल्ली-बम्बैमा हेर
हाम्रा श्रमदेवताहरू पनि उतै
नमाने विदेशी कारखानामा हेर
प्राचीन मूर्ति र प्रतिमाहरू उतै
हाम्रा नयाँ प्रतिभाहरू पनि उतै
हिँड, हामी पनि उतै जाऔँ
नेपाल हेर्न विदेश जाऔँ ।
फकलैण्ड, करगिल र कोसोभोमा
गोरखाली चिहानहरू उतै
लाहुरे र दरबानको रूपमा
देशभक्त महान् हरू उतै
सीप उतै, बुद्धि उतै
रगत उतै, पसिना उतै
पहिचान खोज्न उतै जाऔँ
नेपाल हेर्न विदेश जाऔँ ।
०००
तिमी नरहे देश डुब्न्याछ (२०५६)
Subscribe
Login
0 Comments
Oldest
