नेपाली हास्यव्यङ्ग्य अनलाइन पत्रिका

लक्ष्मण नेवटिया :

क्षुद्र विचाररूपी आधारभूमि,
संवेदनाहीन समय र परिवेशको
चक्रव्यूहमा बुजिएर,
सकिरहेका छैनन् पलाउन
मस्तिष्कको बगैंचामा,
आसलाग्दा अक्षरका आँकुराहरू।

अक्षरका यी आँकुराहरूलाई पलाउन
सुविचार र भावको उर्वरा माटो चाहिन्छ।
कल्पनाको माया र मुस्कान चाहिन्छ
लेखन लक्ष्यको दिशा निर्देश चाहिन्छ।
आँकुरा प्रति विश्वास र सम्मान चाहिन्छ।
तर जब पाउदैनन् मलजल
तब भएर व्यथित आँकुराहरू ओइलाउछन्।

मनका अनियन्त्रित आवेगहरूलाई
कुण्ठित मानसिकतालाई
आशाको उज्यालोले पखालेर
जबसम्म संगालिदैनन् ।
जति गर्दा पनि अनुनय विनय
जति गर्दा पनि प्रार्थना
अक्षरका आँकुराहरू पलाउदैनन्।

तर अब सत्यको मार्गमा हिँडाएर,
अन्यायका विरुद्ध शंखनाद गरेर,
कुटिल स्वार्थ सँगको संघर्षमा नडगमगाएर,
समयको परीक्षामा खरो उत्रिएर,
हरेक निराश मुटुमा, जगाउन जोश र उमंग।
उत्साहको भूमिमा बीजारोपण गर्दै,
देखाउनु छ पलाएर,
कुनै कालखण्डले पनि
ओइलाउन नसक्ने
“अक्षरका आँकुराहरू”।

०००
विराटनगर