नेपाली हास्यव्यङ्ग्य अनलाइन पत्रिका

गायत्री परिराेशनी :

मेरी एक मात्र प्रियतम
मेरो लागि,
आकाशको जून खसाल्ने तिमी
किचनमा थोरै नुन खसाल्ने तिमी ।
मेरो मनको फूलबारीमा डुल्ने तिमी
जिन्दगीको सुवास छर्दै,
फुरफुर–फुरफुर उड्ने तिमी ।
आज तिम्रो जन्मदिन
बजारमा किन्न पाइने भन्दा बढी
सुनैसुनको शुभकामना ॥

अँ साँच्ची आजभोलि त तिमी
आफू आफैसँग सल्किएकी छौ रे
हरेक रात,
आफूले आफूलाई माया गर्न
पल्किएकी छौ रे
आफूले आफूलाई सिमाविहिन माया गर्न
जानेकी तिमी ।
आफूले आफैलाई
आदर, सत्कार र सम्मानको
झटारो हानेकी तिमी ।
आज तिम्रो जन्मदिन
अहिलेको जस्तो धूलो होइन
ठूला–ठूला ढिके,
नुनैनुनको शुभकामना ॥

आडम्बरको बोक्रा–बोक्रा
केलाएर फाल्ने तिमी,
मनमुटु र मष्तिस्कमा
विषालु खिल गाड्ने आफन्तहरुसँग
स्वइच्छाले हार्ने तिमी ।
भैँसी नपालेरै पनि
बार्‍है महिना
सकारात्मक चिन्तनको
मही पार्ने तिमी ॥

समय र परिस्थितिका
काला बादलहरुसँग समेत
मस्तले फार्ने तिमी
आज तिम्रो जन्मदिन
मेरो शरीर भरिको
खुनैखुनको शुभकामना ॥

बेकाममा दूनियाँको चियोचर्चो नगर्नू
आफू आफैसँग आहा भएर बाँच्नू ।
भोलि भेटिदैँन कहिल्यै,
आजै मस्तसँग हाँस्नू ॥

शरीर, मन र मष्तिस्क
स्वस्थ्य हुनुपर्छ माया,
यसको लागि स्टेज चाहिँदैन ।
भान्छाकोठामा मस्तले नाच्नू ॥

आफ्नो जीवन आफूलाई
खास भएसम्म,
चिन्ता र भयमुक्त भएर बाँच्नू ।
आज मेरी,
एकमात्र मायालुको जन्मदिन
मैले गर्न जानेको माया भन्दा
अझ धेरै अमूल्य,
गुणैगुणको शुभकामना ॥

०००
स्याङ्जा