नेपाली हास्यव्यङ्ग्य अनलाइन पत्रिका

अनिश श्रेष्ठ :

निश्चल म
मैले कोरेका रंगीन सपनाहरु
अनि मेरो सपनाको रंगीन संसार
मैले मेरा चित्रहरूमा रंग भर्दै गर्दा
मेरो आँखामा झल्किने ती सपनाहरु
जसले मलाई जीवन्त बनाउँछ
ती चित्रहरूले मेरो जीवन दर्शाइरहेका छन्

मेरो हाँसो,
मेरो खुशी
र मलाई सधैँ साथ दिने मेरा दु:खहरू
मैले भर्दै गरेको रंगहरूको प्रत्येक चालसँगै
छरिएका मेरा भावना
म जति नै निश्चल छु
त्यति नै चञ्चल छ मभित्र लुकेको पात्र
ऊ विना म अधुरो छु
निशब्द छु

ऊ विना मेरो अस्तित्व के?
ऊ छ र पो म चलायमान छु
उसका सपना धेरै रंगीन छन्
मैले कल्पना गरेकोभन्दा पनि फरक
उसलाई हाँस्नु छ
साना–साना खुशीहरू बटुल्न छ
ओठमा मन्द मुस्कान लिएर बाँच्नु छ
सबैलाई खुशी बाँड्नु छ
उसको निःस्वार्थ मन र अनगिन्ति प्रेम
तर चारैतिर छरिएका उसका भावनाहरू
लाग्छ कुनै आँधीले तहसनहस पारेका उसका खुशीहरू

ऊ मौन छ,
तर उसको अनुहारमा झल्किने ती आशा
ओठमा सधैं चम्किरहने मुस्कान
आँखामा देखिने उसका सपना
र, कहिल्यै नथाक्ने उसको मन
म पूर्ण छु, किनकि
ऊ मेरो लागि अधुरो छ

मेरा रंगीन सपनाहरूलाई
उसले आफ्ना कोमल हातले सजाउँदैछ
र म, त्यो सपनाको सुगन्धसँगै अघि बढ्दैछु

म कुसुमी, एक सुन्दर फूल।

०००