नेपाली हास्यव्यङ्ग्य अनलाइन पत्रिका

लक्ष्मण नेवटिया :

गर्ने के ?- १

प्रगति कागजमा द्रुत गति
भुँइमा छैन अलिकति ।
बिजुली घरको मालिक
खोज्छ मैनबत्ती।
गर्ने के ?

गर्ने के ?- २

त्यस विद्यालयमा किन
भए विद्यार्थी फेल?
कारण उही,
हाजिरी गरेर गुरुजी
सधै हुँदा गैल।
हाजिर भएपनि
गफ मज्जाले चुट्नुहुन्छ।
गज्जब त तब हुन्छ,
जब किन भइस फेल भनी
विद्यार्थीलाई नै कुट्नुहुन्छ।
गर्ने के ?

गर्ने के ? – ३

विद्यार्थीले भन्यो –
गुरुजी मलाई केही आउँदैन,
गुरुजीले जवाफ दिए
“मलाई पनि आउँदैन”।
सुनेर उठ्यो ठूलै रीस
मात्रै तिराउन जानेका फिस !
समस्याको मूलमा -त्यही
माथिको “सिफारिस”
गर्ने के ?

गर्ने के ? – ४

जुन स्कूलमा शिक्षक
आपसी द्वन्दमा चिच्याउँछ,
केंटिनमा विद्यार्थी
चाउचाउ चपाउँछ।
बाआमा पढाउन सन्तति
भएभरको लुटाउँछ,
तैपनि हुँदा फेल,
बहाना अनेक देखाउँछ
सत्यतथ्य लुकाउँछ,
गर्ने के ?

०००
विराटनगर