नेपाली हास्यव्यङ्ग्य अनलाइन पत्रिका

डिल्लीप्रसाद मूलतिहुन :

देखियो पाठशालामा चर्पी रहेछ सुन्दर
चर्पीकै बासना चल्छ बाहिरैसम्म हर्हर ।१ ।

पलास्टिक डढाएर कालो छर्ने नयाँ कुरा
ढुक्कले सिक्नसक्नेछन् ठूलासाना सबै भुरा।२ ।

माटो खन्न मुसालाई सुबिस्ता छ उसैगरी
हावापानी सबै शुद्ध यसो गर्दा सधैँभरी ।३ ।

थोते पर्खालका भित्ता हाँस्छन् देखाउँदै गिजा
हल्लिन्छन् बनमाराका बुटाहरू लिँदै मजा ।४ ।

थाङ्नाथुङ्नी फिँजाएर चारैतिर सजाइयो
खुसीले काग नाचेको बिहानै देख्न पाइयो । ५ ।

छाडा कुकुरको जत्था यो दृश्य हेर्न आउने
साह्रै रमाइलो मान्दै यतै बस्न रुचाउने ।६ ।

कक्षाकोठाहरू जम्मै चिटिक्क कोरकारमा
छाडाशब्द बडोशुद्ध लेखिएको जहाँतहाँ।७।

फूलका बिरुवामाथि थोत्रा कागज थुप्रियो
छाडा कुकुरले हाल्छन् फूलमा मल देखियो ।८ ।

धुपी सजाउने नौलो तरिका देख्न पाइयो
हाँगा बोट चिथोरेर ठुटा चाहिँ बँचाइयो ।९।

विद्यालय यसैबाट बुझिन्छ कति अब्बल
गुणस्तरीय शिक्षामा पुग्छ यसैगरे बल ।१० ।

यत्तिकै सुविधायुक्त पाठशाला बनाउन
सकेदेखि अरू गर्नै पर्दैनथ्यो गनाउन ।११ ।

०००
चाँगुनारायण, भक्तपुर