नेपाली हास्यव्यङ्ग्य अनलाइन पत्रिका

लक्ष्मण नेवटिया :

सबथोक भएर पनि हामी सँग,
केहि नभएजस्तो भन्ने
किन छ उदासीन प्रवृति ?
विदेशीले हामीलाई बिचरा भन्न
पाउने कसले दियो स्वीकृति ?
कसरी जन्मियो यस्तो परिस्थिति ?
प्रश्न त छ, तर अनुत्तरित।

उपद्रवी नै किन घोषित हुन्छन्
शान्तिदूत,
सपुतको पगरी किन उनलाई
जो छन् कपुत,
पापयुक्त भएर पनि किन उन्मुक्त ?
प्रश्न त छ, तर अनुत्तरित ।

जसले कतै केही गर्ला अलिकति
पनि छैन आश,
स्वार्थमा चुर्लुम्म खोक्रो अस्मिता
कुनै छैन खास,
उही किन अगुवा?जो छ बाटो हगुवा !
प्रश्न त छ, तर अनुत्तरित।

किन हराएको छ
कर्तव्यबोधको संस्कार ?
माटोको ऋण तिर्नेतर्फ किन कसैको
पलाउदैन रत्तिभर विचार ?
किन हावी छ हामीमाथि
विसंगतियुक्त घीनलाग्दो विकार ?
प्रश्न त छ, तर अनुत्तरित ।

किन घाइते हुन्छ पटक-पटक
हाम्रो विश्वास,
किन लुकाइन्छ जो छ हाम्रो
साँचो इतिहास ?
एक युगीन परिवर्तनको किन
हामी गर्दैनौं प्रयास ?
प्रश्न त छ, तर अनुत्तरित।

०००
विराटनगर